चमचमीत तवा पापलेट फ्राय

हाडाच्या मत्स्यगोत्रींना तळलेले मासे म्हणजे स्वर्गानुभवच ! त्यातून सुरमई , पापलेट , रावस असा समुद्राचा फडफडीत  चंदेरी खजिना जेव्हा कोळणींच्या  टोपल्यांत सजतो तेव्हा ठरलेलं  नसताना सुद्धा बाजारच्या पिशवीतून  एखादी लांबुडकी सुरमईची शेपटी बाहेर डोकावत हळूच स्वयंपाकघरात ओट्यावर विसावते .

त्यातून पापलेट म्हणजे समुद्राचे चंदेरी सोने .. बरोबर म्हणतेय ना ? अहो , “माशांचा राजा”  म्हणावा अशी या पापलेटची  ख्याती ! एक तर चवीला सगळ्यात उत्तम , त्यातून साफ करायला सोप्पा ..  माझी आजी तर तिचे दंताजीचे ठाणे उठलेले तोंडाचे  बोळके  सावरत   म्हणायची,  ” पापलेट ना , आता होईल रांधून , सगळ्यात सोच्छ sss  म्हावरा तो !”    –  एकच मधला मोठा काटा आणि बाकीचे लिंबू- टिंबु काटे सोडले तर खायला म्हणून सान – थोरांचा फ्याव sss रेट  मासा ! इतकेच काय नवोदित मत्स्यप्रेमी सुद्धा प्रॅक्टिस म्हणून आणि बिलकुल वास न येणारा मासा म्हणून पापलेटचीच निवड करतात ! म्हणूनच कुठल्याही हॉटेलात , मग ते कोकणच्या घाटातील गर्द  वनराजीतले लाल मातीच्या घरातील  असो की , ” युअर ऑर्डर प्लीज , मॅडम “,  म्हणून टाय बूट घातलेल्या सर्व्हर्स नी भरलेले पंच/सप्त – तारांकित असो , पापलेटचा  ताठा  हा मेनूकार्ड वर दिसतोच !

आता माझीच गंमत  तुम्हाला सांगते .. रत्नागिरीतील ” माशांचा गाव ” , अशी ख्याती असलेले मिऱ्या बंदर , आणि त्या बंदरावर समुद्राच्या गाजेच्या  आवर्तनात एका  कोकणी घरात माशांच्या वारी – रविवारी ( सगळ्यांसाठी तो सूर्यदेवतेचा वार असला तरी )   अस्मादिकांनी जन्म घेताना ” ट्यँहव sss  ” केले .  कोणत्याही  आकारमानाचे मासे खाताना, ” काट्याने काटा काढणे ” , या मराठी वाक्प्रचाराचा अर्थ अंगी सॉरी तोंडी बाणवून, ताटाबाहेर फक्त काट्यांचा ढीग लावणे , हे आम्हाला उत्तम जमते ! मासे विकत घेताना , मग ते खचाखच भरलेल्या मासळी  बाजारात  की आता दुकानात , कालवण / सुक्क्यासाठी लहान मासे घेऊन झाले , तोंडी लावायला , तळायला  सुरमई , रावस पिशवीत भरला तरी , हिरोईनने नकार दिलेल्या हिरोसारखी , मी मागे वळून वळून त्या पापलेट कडे प्रेमाने पाहतच असते . मग शेवटी पार्टनर वैतागून ओंकारला ( माझा मासेवाला मैतर , पूर्वजन्मीच्या भाऊरायाच  म्हणेन ) म्हणतोच , ” भर दे यार दो  पापलेट अख्खा  “, आणि मग चरफडत माझं  बकोट  खसकन ओढत दुकानाबाहेर पडतो .

माशांवरच्या अतीव प्रेमामुळेच मला कोळीगीतं  सुद्धा जाम आवडतात , आणि अशा अत्यानंदाच्या प्रसंगी आपसूकच तोंडात येतेच की हो , ” माझ्या सरंगा , माज्या सरंगा , चंदेरी पापलेटा  रं , खापरी पापलेटा  रं .. चल  जाऊया घरा .. तळते तुला रं  अख्खा भरून , नाहीतर तुकड्या पिठात घोळवून अ अ अ  ….. ”

तर या पूर्वी मी  पापलेट हिरवा मसाला , झटपट लगबगीच्या वेळेत होणारे  कुरकुरीत पापलेट फ्राय शेअर केलेच आहे . आजची रेसिपी थोडी विस्तारीत , कारण यात आपण पापलेट दोनदा मॅरीनेट करणार आहोत आणि तुमच्या घरातल्या  पार्टीसाठी एकदम मस्त अशी स्टार्टर रेसिपी ! या रेसिपीत मी खापरी पापलेट वापरले आहेत , जे नेहमीच्या चंदेरी , तुकतुकीत पापलेटहून  जास्त खवले असणारे आणि साधारण काळसर रंगाचे . या पापलेटविषयी मी सविस्तर लिहीनच , माझ्या पुढच्या ब्लॉगमध्ये  , तोपर्यंत  तुम्ही नक्की बनवून पहा हे चमचमीत तवा पापलेट फ्राय!

विडिओ पाहण्यासाठी खाली क्लिक करा
Click to watch recipe video