हॉटेलसारखी कुरकुरीत सुरमई रवा फ्राय

महाराष्ट्राची “मासेमारी राजधानी” म्हणून संबोधण्यात हरकत नाही , अशा ” रत्नांगिरी ” या रत्ननगरीतला माझा जन्म , आणि कोकणी माणसाच्या गुणसूत्रांचा भाग ठरावा , इतके मत्स्यप्रेम  माझ्याही नसानसांत दौडत आहे . त्यामुळे पानात वाढलेला  मासा हा कुठल्याही आकाराचा असला,  तरी दोन घास जरा जास्तच पोटात पडतात ,यात कोणत्याही मिश्राहारी  कोकणी  जीवाचे दुमत नसावें !

त्यात सुरमई मासा हा सगळ्यांशी  फ्रेंडली …  एक तर याला स्वतःची अशी उग्रट चव नसते , दिसायला चकचकीत चंदेरी काळसर रंगाचा , आणि पातळ कातडीचा ! फिश फ्राय , कटलेट अशासाठी एकदम उत्तम … माझ्या कित्येक मित्र मैत्रिणींनी मत्स्याहार या सुरमईपासूनच सुरु  केला आहे .सुरमई  साफ करणे म्हणजे एकदम सोप्पे काम, तिला  जास्त खवले किंबहुना नसतातच, असे म्हटलेत तरी चालेल ! डोक्याजवळचा भाग कापून पोटातली घाण अलगद बाहेर निघते . थोडी तिरकस कापून  साधारण अर्धा इंच जाडीचे तुकडे  करणे एकदम बेश्ट , त्याने  सुरमईचा  तुकडा जरा लांबट दिसतो .

त्यातून जर ही भली मोट्ठी ईसवण  जाळ्यात , आपले ते .. बाजार पिशवीत गावली की आमच्या आनंदाला सुमारच राहत नाही !  मग घरी आणून त्या हातभर  उंचीच्या तुकडीवर हळद ,मीठ , लिंबाच्या रसाचे किंवा कोकमाच्या आगळाचे यथासांग सोपस्कार करून ती  खोलगट भिड्यावर ( खास माशासाठी वेगळे भिडे ) मंद  आचेवर कुरकुरीत तळण्यातच जीवनाची किंबहुना रसनेचि धन्यता मानली जाते …..

आता मासे तळण्याच्या विविध पद्धती कोकणातल्या खाद्यसंस्कृतीत आढळतात . माझ्या हिंदी आणि मराठी या दोन्ही यू  ट्यूब चॅनेल वर आणि या ब्लॉग साईट वर तुम्हाला किमान अर्धा डझन रेसिपीज तरी गावतील !  आज मी  ही ईसवण हाटिलात  जशी कुरकुरीत तळून  देतात ना , तशी बनवली आहे . रव्यात घोळवलेली सुरमईची ताजी रेखीव तुकडी अगदी तव्यातून चुर्रर्र आवाज करीत आपल्या टेबलावर येते ना , तेव्हासुद्धा  त्यावरील रव्याचे दाणे गरमागरम तेलाच्या अणुरेणूंशी सलगी करत नाचताना दिसतात .

या पद्धतीने तळलेली सुरमई तुम्ही साध्या फोडणीच्या वरण  किंवा आमटीभातासोबत खाऊ शकता …  माशाचे कालवण सोबत असेल तर क्या बात ! पाहुणे येणार असतील किंवा पार्टीमध्ये स्टार्टर म्हणूनही ही भन्नाट लागते!

सुरमईच्या  कालवणाची माझ्या घरची  रेसिपी वाचण्यासाठी –https://kalimirchbysmita.com/surmai-curry-konkani-style/

सुरमई तवा  फ्राय बनवण्यासाठी –https://kalimirchbysmita.com/surmai-tawa-fry-recipe-marathi/

विडिओ पाहण्यासाठी खाली क्लिक करा
Click to watch recipe video