Green Chili Pickle-Maharashtrian style- हिरव्या मिरचीचे लोणचे
Author: 
Cuisine: Indian
 
Ingredients
  • हिरव्या मिरच्या पोपटी किंवा जराशा गर्द हिरव्या रंगाच्या ( काळपट हिरव्या घेऊ नयेत ते लोणचे राकट लागते चवीला ) - ५०० ग्रॅम्स ,
  • ५ लिंबाचा रस ( साधारण अर्धा कप ),
  • पिवळी मोहरी किंवा पिवळ्या मोहरीची डाळ ४- ५ टेबलस्पून ( ५० ग्रॅम ),
  • हळद दीड टेबलस्पून ( १५ ग्रॅम ) ,
  • मेथी दाणे एक टेबलस्पून ( १५ ग्रॅम ) ,
  • हिंग ३ टेबलस्पून ( ३० ग्रॅम ) ,
  • खडे मीठ ५ टेबलस्पून ( १२५ ग्रॅम ) ,
  • तेल ( शेंगदाणा किंवा सूर्यफूल ) दीड ते २ कप
Instructions
  1. सगळ्यात पहिल्यांदा खडे मीठ मंद आचेवर तव्यात हलके भाजून घ्यावे. थंड झाले की मिक्सरमधून दरदरीत पावडर करून घ्यावी .
  2. अशाच प्रकारे पिवळ्या मोहरीची ( न भाजता ) मिक्सरमधून जाडसर पावडर करून घ्यावी . तुमच्याकडे पिवळ्या मोहरीची डाळ असेल तर हे करायची गरज नाही . पिवळी मोहरी नाही मिळाली तर नेहमीच्या काळ्या मोहरीची अशीच मिक्सरमधून फिरवून जाडसर पावडर वापरावी !
  3. याच पद्धतीने मेथीसुद्धा ( न भाजता ) जाडसर फिरवून घ्यावी .
  4. मिरच्यांना स्वच्छ धुऊन त्यांचे देठ काढून घ्यावेत . डागाळलेल्या , मऊ झालेल्या मिरच्या किंवा तुकडे पडलेल्या मिरच्या वापरू नयेत . नंतर या मिरच्यांना स्वच्छ कापडावर पसरून पुसून घ्यावे . पाण्याचा अंश राहू देऊ नये . देठं काढल्यावर साधारण मिरच्यांचे वजन ४५० ग्रॅम होते .
  5. मिरच्या पूर्ण कोरड्या झाल्या की त्यांना सुरीने मधोमध लांब चिरून एका मिरचीचे साधारण १ इंच लांबीचे तुकडे करावेत .
  6. या मिरच्यांच्या तुकड्यांना १ टीस्पून हळद आणि १ टीस्पून हिंग चोळून घ्यावे .
  7. नंतर एका कढईत साधारण अर्धा कप तेल चांगले गरम करून घ्यावे .
  8. तेल जरासे थंड होऊ द्यावे म्हणजे हाताला चटका बसणार नाही इतपत थंड होऊ द्यावे . ४-५ टेबलस्पून तेल एका मोठया परातीत घ्यावे . त्यात मोहरीची पावडर आणि उरलेले हिंग घालावे .
  9. फोटोत दाखवल्याप्रमाणे हाताच्या तळव्याने जोर देऊन हिंग आणि मोहरी तेलात चांगली फेसून घ्यावी . साधारण ५-६ मिनिटे ही क्रिया करावी म्हणजे मोहरी चांगली चढते आणि नाकाला तिचा सुवास जाणवायला लागतो .
  10. नंतर त्यात उरलेली हळद, मेथी पावडर आणि मीठ घालावे . हे देखील हाताने व्यवस्थित एकत्र करून घ्यावे . हा जो लोणच्याचा मसाला तयार होतो त्याचा सुगंध शब्दांत वर्णन न करता येण्यासारखा !
  11. नंतर या मसाल्यात मिरच्या घालाव्यात आणि नीट एकत्र करून घ्याव्यात .
  12. एक स्वच्छ बरणी घ्यावी . तिला आतून बाहेरून स्वच्छ फडक्याने दाबून पुसावी , अगदी झाकण आणि कड्या सुद्धा ! पाण्याचा अंश राहिला नाही पाहिजे . या बरणीत लोणचे भरावे .
  13. नंतर लिंबाचा रस एका वाटीत काढून घ्यावा . हा रस वरून लोणच्यात ओतावा .
  14. झाकण घट्ट बंद करून ही बरणी फडताळात किंवा जिकडे कोणाचा वावर नसेल त्या जागी किमान ४-५ तासांसाठी ठेवावी . वरून धूळ किंवा तत्सम काही चिकटू नये म्हणून स्वच्छ कापडात गुंडाळलीत तरी चालेल.
  15. ४-५ तासांनंतर साधारण १ ते दीड कप तेल चांगले गरम करावे . तेल अगदी कोमट किंवा थंड होऊ द्यावे . हे तेल वरून लोणच्यात घालावे . तेल इतके घालावे की मिरच्यांचा वरचा भाग तेलात पूर्ण बुडाला पाहिजे . असे केले तर लोणच्याला बुरशी लागत नाही .
  16. नंतर ही बरणी परत स्वच्छ कापडात गुंडाळून एका बाजूला ठेवावी . साधारण आठवड्या भरात हे लोणचे खायला तयार होते .
Recipe by Kali Mirch - by Smita at https://kalimirchbysmita.com/green-chili-pickle-maharashtrian/